Özbegistanyň Samarkant şäherinde geçirilen Şanhaý Hyzmatdaşlyk Guramasynyň nobatdaky Sammitinde Türkmenistanyň Prezidenti Serdar Berdimuhamedow Hytaý Halk Respublikasynyň Prezidenti Si Szinpin bilen ikitaraplaýyn duşuşyk geçirdi. Onuň dowamynda türkmen Lideri Hytaý — Gazagystan — Türkmenistan — Eýran halkara ulag geçelgesi boýunça konteýner gatnawlaryny ýola goýmakda dörttaraplaýyn şertnamany baglaşmagy teklip etdi. Bu barada «Нейтральный Туркменистан» gazeti habar berýär.

Çeşmede bellenilişi ýaly, hyzmatdaşlygyň iň möhüm ugurlarynyň hatarynda ulag-logistika pudagy hem ara alnyp maslahatlaşyldy we bu nukdaýnazardan Hytaý — Gazagystan — Türkmenistan — Eýran demir ýol gatnawynyň täze ugur hökmünde geljegi uly diýlip kesgitlenilýär. Bellesek, Hytaý — Gazagystan — Türkmenistan — Eýran täze demir ýol geçelgesi 2014-nji ýylyň dekabrynda işe girizildi. Ol Hytaýdan Eýrana çenli aralygy 500 km gysgaltmaga mümkinçilik berýär.

Mundan başga-da habar berlişine laýyklykda, gepleşiklerde HHR-iň Prezidenti Si Szinpin Türkmenistan — Hytaý gaz geçirijisiniň dördünji şahasynyň gurluşygyny goldaýandygy, bu taslamanyň esasynda Türkmenistanyň Hytaýa tebigy gaz üpjünçiliginiň her ýylda 65 milliard kub metre barabar boljakdygy nygtalýar.