Türkmenistan Eýrandan diňe Aşgabat şäherine barýan we agramy 20 tonnadan geçmeýän ýük ulaglaryna «Howdan ― Bajygyran» gözegçilik-geçiriş nokadyndan geçmäge rugsat berdi.

Bu barada Eýranyň Daşary işler ministrliginiň Horasan sebitindäki wekili Mohammad Beheşti habar berdi ― diýip, IRNA habarlar agentligi ýazýar.

Mälim edilişine görä, iki ýurduň arasyndaky söwda gatnaşyklary mundan beýläk hem ösdürmek maksady bilen, türkmen tarapy Eýranyň 10 sany ýük awtoulagyna ady agzalan serhet gözegçilik-geçiriş ýerinden geçmäge rugsat etdi. Bütin dünýäde dörän COVID-19 ýagdaýlary sebäpli, «Howdan-Bajygyran» serhet gözegçilik-geçiriş ýeri ýük awtoulaglary üçin 3 ýyllap wagtlaýyn ýapyk bolupdy. Häzirki wagtda türkmen-eýran serhedindäki ähli gözegçilik-geçiriş ýerleri arkaly ýükleri geçirip bolýar.

Bajygyran serhet gözegçilik-geçiriş nokady Aşgabatdan 35 kilometr günortada ýerleşýär.

Golaýda Türkmenistanyň Daşary işler ministrliginiň guramagynda Türkmenistan — Eýran döwlet serhedinde ýerleşýän «Howdan-Bajygyran» gözegçilik-geçiriş ýerinde iki ýurduň gümrük edaralarynyň ýolbaşçylarynyň iş duşuşygy geçirildi.